بالفرح بالزعل....منق
وقت بنكره ولما منحب ....منق
لما منكون فاضيين أو حتى مشغولين.....منق
صبح ومسا وكل شي عنا بينتسى إلا النق
بالجد وبالمزح.....منق
::: جذور النق :::
الشاب العربي ( شباب وصبايا ) منين بيجيبوا هالنق ؟!؟!؟
باختصار بجيب النق من بيت أبوه حبيبي.....لا عن جد عم أحكي ما عم أمزح
فنحن جيل اعتاد على التربية النقاقة.....
قوم فيق صارت الساعة ستة
تعال اتغدى
جاي جاي
يلا قوم اتغدى
جاي بس دقيقتين
يلا تعال اتغدى....قوم اتغدى هلأ بيبرد الأكل
قوم اتغدى يلا....
وفي السهرة :
تعال تعشا ما تغديت منيح لأنك...
تعال تعشى...ما بدك تتعشى...يلا قوم ع العشا....
::: حكاية نق :::
في سنة البكالوريا: إيمتى بدي خلص وفوت ع الجامعة بقا (( وبيضل بينق وينق وبينسى يدرس.....))
في السنة الأولى للجامعة:أووف شو عم حن لأيام المدرسة...إيمتى بدي أتخرج يالله هف لسه كم سنة هفف
بعد التخرج : ييي شو مشتاق لرفقاتي بالجامعة وكيف كنا....هفف يا ريتنا ما تخرجنا ضاق خلقي من النوم للضهر والطلعات والفرجة ع التلفزيون بدي اشتغل واستقر
بعد الشغل : تضرب هالحياة من البيت للشغل وبعدين بتحكيلك كم تلفون وبتحط راسك وبتنام لتفيق ع الشغل...شو هالعيشة هفف والله شي بملل...حياة بتقصر العمر
خطب بنت بحبها:هفف إيمتى بدنا نتزوج ونكون مع بعض لوحدنا...
أتجوزوا:هفف من هالروتين والله شي بملل شو رأيك نجيب ولد
صار الشب أبو العيال: لك شو هالبلوة بدي ضل عم زق غراض متل الحمار...هفف ع هالعيشة يرحم أيام كنا راسين....وقت كنا مو فاضيين غير للحب
::: أعزائي الأعضاء كنتم مع مسلسل هفف من بطولة نقاق سوري :::
::: جاي على بالي نق :::
صار النق في حياتنا حالة طبيعية اعتيادية وعفوية....فمن دون أن نقصد ننق
فإذا التقت فتاة بشاب وأحببته ( وصار في علاقة ) وبدأ روميو زمانه يعمل رجال عليها ويبلش يسألها وين رايحة منين جاية وينق إذا لبست هيك أو إذا ضحكت هيك أو إذا قالت هيك....هنا تبدأ الفتاة بدورها الهام وتقوم بالنق على رأسه ( أنا هيك..أنت عم تشك فيني..شو مافي ثقة..أنت عم تحكم على علاقتنا بالنهاية إذا بدك تضل غيور..وعلى إيهي إيهي ) ومن كتر نق جوليت على رأس روميو...يقرر روميو يطنش ويعطيها حريتها
وما هي إلا أيام حتى تعود جولييت إلى نقها ولكن بطريقة مختلفة
ليش ما عم تسأل علي...تأخرت اليوم ليش ما دقيتلي تطمن عليي...ما شفته كيف كان عم يطلع فيني....أجاني ميس كول من رقم غريب وما حاولت تعرف مين صاحب الرقم..شو شايفة ما عاد فرقت معك إذا لبست هالتنورة...)) قلي فهمني شو بدك !!؟!!!
::: نقاق شرقي :::
شاب شرقي نقاق : أنا بدي امرأة مثقفة ارتبط فيها تفهم عليي شو بحكي وتناقشني فيه ويكون عندها وجهة نظرها يلي تدافع عنها
(( بعد الزواج من المثقفة والذي لم يستمر أكثر من 3 أشهر ))
الشاب شرقي النقاق : طلعتلي روحي بضل حاطة راسها بالكتاب...لا بهمها طبخ ولا نفخ...بعدين بضل عم تجادلني...وعلى وجهة نظري ووجهة نظرك هديك المرة لسختها كف طيرتلها وجهها كله مو بس وجهة نظرها...هفف أن بدي وحدة حنونة تسايرني
(( بعد زواجه من الحنونة الذي لم ولن يستمر أكثر من شهرين ))
الشاب شرقي النقاق : قرفتني حياتي دايماً بالمطبخ وشو ما قلتلها بتقول حاضر.
كيف بدها تربي ولادي على هالشخصية الانهزامية لا بتهش ولا بتنش وحتى لما طلقتها بكيت شوي وما حكيت معي ولا كلمة يا زلمة.....
لك أنا بدي وحدة حلوة ست بتفهم بالاتيكيت.....
(( بعد زواجه من ست الصالون الذي لم ولن يستمر أكثر من شهر ))
الشاب شرقي النقاق : هفف يا زلمة هلكتني بمصاريف اللبس والمكياج تبعها هالمفزلكة يخرب بيتها شو فاضية ما في ولا مرة قرأت شي كتاب وشو ما بتحاكيها بتقلك ما بعرف وشو يعني....(( لك أنا ما بقدر غير عيش مع وحدة مثقفة يا زلمة ))
ويستمر الشاب شرقي النقاق بالنق إلى أن يأخذ الله أمانته
أجمل ما في الأرواح أنها لا تملك لسان لتنق....أي والله
::: شعب بنق ليوم النق :::
والشعب العربي بشكل عام نقااااااااااااااااق .....
ها ها سألتني ليش لأنو يا أخي نحنا على طول بنقول شوف أوربا ما أحلا شوارعها
شوف العالم شلون.....شوف شوف السير عندهم شوف النظافة....
شوف........أي شفت (( شبك حبكت معك شوف شوف ))
ما نحن هون بالبلد لم فرض وضع حزام الأمان للسائقين
قمنا الدنيا وما قعدناها وصرنا نق ونسق
والله بدفع الغرامة وما بحط الحزام...شو بدهون يتحكموا فينا
وقال شو بدهون يقلدوا بلاد برا قال...!!؟!؟!؟!؟!!
السبت نوفمبر 02, 2013 11:18 pm من طرف بنفسجيه
» للبيع: 2011 LEXUS LX570 - $17,000 USD
السبت مايو 11, 2013 4:21 am من طرف محركالسيارة
» للبيع: 2011 LEXUS LX570 - $17,000 USD
السبت مايو 11, 2013 4:14 am من طرف محركالسيارة
» “الحرب الأهلية في سوريا تواجه طريقا مسدودا”
الأحد ديسمبر 23, 2012 12:57 pm من طرف الشامي
» الرومانسية المفقودة...
السبت ديسمبر 22, 2012 8:45 pm من طرف الشامي
» ما الذي يدفع الزوج للهروب إلى أخرى؟!
السبت ديسمبر 22, 2012 8:26 pm من طرف الشامي
» ايران تقول صواريخ حلف شمال الاطلسي تضر بامن تركيا
السبت ديسمبر 22, 2012 8:15 pm من طرف الشامي
» الأسد قلق ولا ينام في بيته.. ونظامه هرب إلى الساحل
الجمعة ديسمبر 21, 2012 10:07 pm من طرف الشامي
» تجمع أنصار الإسلام يتوعد بهجمات قريبا في دمشق
الجمعة ديسمبر 21, 2012 8:29 am من طرف الشامي